സിസേറിയൻ ഗ്രാമം

സയൻസൺ പുന്നശ്ശേരി

2017 ജൂൺ ഒന്നിനു

ചേർത്തലയിലെ എൽ.പി.സ്കൂളിലെ

ഒന്നാം ക്ലാസിലെത്തിയ

ജിഷടീച്ചർക്ക്

മൂപ്പെത്തും മുൻപ് പറിച്ചെടുത്ത്

കാർബൈഡിൽ പഴുപ്പിച്ച്

ചായം പൂശി മൂടി പിന്നിക്കെട്ടി

മുല്ലപ്പൂ ചൂടിയ വിദ്യാർഥികൾ

നല്ല നമസ്കാരം പറഞ്ഞു

പേരും പൊരുളും

ചോദിച്ച് ക്ലാസ് തുടങ്ങാനുറച്ച്

ടീച്ചർ ചോദ്യങ്ങളെയ്തുതുടങ്ങി



പേരിനു മാത്രമേ മാറ്റമുള്ളു

പേറിനു മാറ്റമില്ലാത്തതിനാൽ

എല്ലാ ചോദ്യങ്ങൾക്കും ഒരുത്തരമായിരുന്നു

ഒരേ പ്രായത്തിന്റെ ഭാവവും

അവധിയെടുക്കാൻ

പുതിയ ഉത്തരം കണ്ടെത്തിയതിന്റെ

ഇരകളാണ്

ടീച്ചർക്ക് മുന്നിൽ ചോദ്യങ്ങളായി

നിരന്നിരിക്കുന്നത്

നക്ഷത്രഭാഗ്യം തെട്ടാതിരിക്കാൻ

അമ്മയുടെ വയർ കീറിയെത്തുന്ന

സമയപ്പൊരുത്തം

എണ്ണിയൊതുക്കാമായിരുന്ന

കണക്കായിരുന്നെങ്കിൽ

പിന്നിക്കെട്ടിയിട്ടും

ചിതറിപ്പോവുന്ന

കുസൃതി തലമുടികണക്കെ

കളാസും സ്കൂളും കവിഞ്ഞ്

പാൽചിരി നാടാകെ പെരുകുന്നു