നിലാവിലെ പൂമരങ്ങള്‍

dr. ismail maritheri

പൂമരങ്ങള്‍ നിലാവില്‍

പതുക്കെ പറഞ്ഞത്
വാര്‍ദ്ധക്യത്തെ പറ്റിയായിരുന്നു.
ഇടതൂര്‍ന്ന ശാഖികളില്‍
തഴംബിച്ച ചുളിവുകള്‍.
വേരെത്തിയ വഴികളില്‍ നിന്നും
തിരിഞ്ഞു നടത്തം.
ഓര്‍മകളില്‍ കല്‍കൊത്തളങ്ങളും
ഈര്‍പ്പം തേടിയലഞ്ഞ ബാല്യവും.

കിളികള്‍ കുറുകിയ കൌമാരം
ഇടയ്ക്കിടെ മങ്ങി തെളിയുന്നു.
.
ഉച്ച്ചത്തീ കുടിച്ചും
പെരുമഴ നനഞ്ഞും
പോരാടി നിന്ന യൌവനം
ഇടനെഞ്ഞിലിപ്പോഴും
ഇടറി ഇടറി കനല് കോരുന്നു

കൂട്ടിനിപ്പോള്‍
കണ്ണുകളെ മാത്രം സജലങ്ങളാക്കുന്ന
ഭീതിത ജലരഹിത സായാഹ്നങ്ങള്‍.
പൂവും വേരും കായും
മരവും ചേര്‍ന്ന സമവാക്യത്തില്‍
ചിഹ്നങ്ങള്‍ ചിതലരിക്കുന്നതു കണ്ടു
നിലാവിലങ്ങനെ

ശേഷിക്കും പൂക്കളും പേറി
നെടുവീര്‍പ്പിലാണ് പൂമരങ്ങള്‍ .